Текст песни Хор братии Валаамского монастыря - Великий Четверг - Стихиры

Стекается прочее соборище иудейское, / да Содетеля и Зиждителя всяческих Пилату предаст: / о беззаконных, о неверных! / Яко грядущаго судити живым и мертвым, на суд готовят: / исцеляющаго страсти, ко страстем уготовляют. / Господи долготерпеливе, / велия Твоя милость, слава Тебе.

Преподобного Иоанна Дамаскина

Иуда беззаконный, Господи, / омочивый на Вечери руку в солиле с Тобою, / простре к беззаконным руце прияти сребреники, / и мира умысливый цену, / Тебе Безценнаго не убояся продати: / нозе прострый во еже умыти, / Владыку облобыза льстивно, во еже предати беззаконным: / лика же апостольскаго отвергся, / и тридесять поверг сребреники, / Твоего тридневнаго воскресения не веде, / имже помилуй нас.

Иуда предатель льстив сый, / льстивным лобзанием предаде Спаса Господа, и Владыку всех, / яко раба продаде иудеом: яко овча на заколение, / тако последоваше Агнец Божий, Сын Отчий, / един Многомилостивый.

Иуда раб и льстец, ученик и наветник, / друг и диавол от дел явися: / последоваше бо Учителю, и на Него поучашеся преданию, / глаголаше в себе: предам Того, и приобрящу собранная имения, / искаше же и миру продану быти, / и Иисуса лестию яти. / Отдаде целование, предаде Христа: / и яко овча на заколение, сице последоваше / един Благоутробный и Человеколюбец.